दिवाळी सुट्टीत नागरिकांनी घ्यावयाची काळजी – सावदा पोलीस स्टेशनचे आवाहन

दिवाळी सुट्टीत नागरिकांनी घ्यावयाची काळजी – सावदा पोलीस स्टेशनचे आवाहन

 आवाज परिवर्तनाचा न्यूज नेटवर्क 

सावदा (प्रतिनिधी):

दिवाळी सुट्टीच्या काळात अनेक नागरिक आपल्या मूळ गावी किंवा नातेवाईकांकडे सण साजरा करण्यासाठी जात असल्याने, सावदा पोलीस स्टेशनतर्फे नागरिकांना सुरक्षिततेच्या दृष्टीने काही महत्त्वाच्या सूचना देण्यात येत आहेत.

सावदा पोलीस स्टेशनचे सहायक पोलीस निरीक्षक श्री. विशाल पाटील यांनी सांगितले की —

 “दिवाळी निमित्त शाळा आणि सरकारी कार्यालयांना सुट्टी लागल्याने अनेक घरे रिकामी राहतात. नागरिकांनी घर बंद करून बाहेरगावी जात असताना आपल्या मौल्यवान वस्तू, रोख रक्कम, सोन्या-चांदीचे दागिने घरात ठेवू नयेत. या वस्तू बँकेच्या लॉकरमध्ये ठेवाव्यात किंवा सोबत घ्याव्यात.”

तसेच त्यांनी पुढे सांगितले की —

बंद घराची माहिती शेजाऱ्यांना आणि पोलीसांना देणे आवश्यक आहे.

गल्लीतील अनेक कुटुंबे बाहेर जात असल्यास, काही दिवसांसाठी रात्री पहारा ठेवण्यासाठी गुरखा नेमावा व त्याबाबत पोलीस स्टेशनला कळवावे.

बंद घराच्या परिसरात लाईट सुरू राहील याची व्यवस्था करावी.

शक्य असल्यास परिसरात सीसीटीव्ही कॅमेरे लावावेत.

शेजाऱ्यांशी सातत्याने संपर्कात राहावे, कारण “आपला शेजारी हाच खरा पहारेकरी” आहे.

पुढे पोलीस निरीक्षक पाटील यांनी नागरिकांना आवाहन केले की —

“रात्र-अपरात्र संशयास्पद व्यक्ती परिसरात फिरताना दिसल्यास नागरिकांनी तात्काळ सावदा पोलीस स्टेशनशी संपर्क साधावा किंवा ‘डायल 112’ वर कॉल करून माहिती द्यावी. मात्र, संशयित व्यक्ती पकडल्यास त्याला मारहाण करू नये.”

शेवटी सावदा पोलीस स्टेशनतर्फे सर्व नागरिकांना विनंती करण्यात येते की, आपली संपत्ती सुरक्षित ठेवा आणि सुरक्षित, आनंदी दिवाळी साजरी करा.