रन फॉर युनिटीद्वारे राष्ट्रीय एकतेचा संदेश — सावद्यात सरदार वल्लभभाई पटेल जयंतीनिमित्त “एकात्मतेची धाव”

रन फॉर युनिटीद्वारे राष्ट्रीय एकतेचा संदेश — सावद्यात सरदार वल्लभभाई पटेल जयंतीनिमित्त “एकात्मतेची धाव”

आवाज परिवर्तन न्यूज नेटवर्क, 

सावदा (ता. रावेर)

भारताचे लोहपुरुष, भारतरत्न सरदार वल्लभभाई पटेल यांच्या १५० व्या जयंतीनिमित्त “रन फॉर युनिटी” या भव्य उपक्रमाचे आयोजन सावद्यात करण्यात आले आहे. उद्या, दिनांक ३१ ऑक्टोबर २०२५ रोजी सकाळी ७.०० वाजता दुर्गा माता मंदिर, सावदा (ता. रावेर) येथून या धाव उपक्रमाची सुरुवात होणार आहे.

या कार्यक्रमाचे आयोजन जळगाव जिल्हा पोलीस दल आणि सावदा पोलीस ठाण्याच्या संयुक्त विद्यमाने करण्यात आले असून, सहाय्यक पोलीस निरीक्षक विशाल पाटील आणि त्यांच्या सहकाऱ्यांनी नागरिकांना मोठ्या संख्येने सहभागी होण्याचे आवाहन केले आहे.

“रन फॉर युनिटी” म्हणजे फक्त धाव नव्हे, तर राष्ट्रीय एकात्मता, बंधुता आणि राष्ट्रप्रेमाचा जीवंत संदेश आहे. समाजातील सर्व घटक  विद्यार्थी, युवक-युवती, महिला मंडळे, सामाजिक संस्था, व्यापारी वर्ग आणि सर्वसामान्य नागरिक  यांनी या धाव उपक्रमात सहभागी होऊन ‘एक भारत – श्रेष्ठ भारत’ या घोषवाक्याला प्रत्यक्षात उतरवावे, असे आवाहन आयोजकांनी केले आहे.

सरदार वल्लभभाई पटेल यांनी देशातील विविध संस्थानांचे एकत्रीकरण करून भारताला एकसंघ राष्ट्र दिले. त्यांच्या या कार्यातून प्रेरणा घेत, “रन फॉर युनिटी” द्वारे एकजूट, शिस्त, आणि देशभक्तीचे संस्कार समाजात रुजविण्याचा प्रयत्न होणार आहे.

 सावदा पोलीस स्टेशनच्या  या धाव उपक्रमात शहरातील रस्त्यांवर “जय सरदार”, “एक भारत – श्रेष्ठ भारत”, “एकतेतच शक्ती आहे” असे घोष घुमणार आहेत. पोलीस विभागाच्या पुढाकारातून सुरू झालेला हा उपक्रम नागरिकांमध्ये सामाजिक जबाबदारी, देशप्रेम आणि ऐक्याची भावना अधिक दृढ करण्यास नक्कीच हातभार लावेल.

या उपक्रमाचा शेवट राष्ट्रीय गीत आणि सरदार पटेल यांना अभिवादन करून होणार आहे.

 “रन फॉर युनिटी” – एक पाऊल ऐक्याकडे, एक संकल्प राष्ट्रासाठी!